СОСТАНОК СО ДЕЛЕГАЦИЈА ОД ЦЕНТАРОТ ЗА АРХЕОЛОГИЈА „ЛАЈБНИЦ“ – МАЈНЦ
На 25 август 2025 година, во Националниот конзерваторски центар – Скопје и во Музејот на РС Македонија се одржа значајна средба со делегацијата од Центарот за археологија „Лајбниц“ од Мајнц (Leibniz-Zentrum für Archäologie – LEIZA, Mainz), предводена од генералната директорка проф. д-р Александра Буш, придружувана од д-р Ингрид Штелцнер и проф. д-р Роланд Шваб.
Во рамки на посетата на Националниот конзерваторски центар, директорот м-р Александар Јорданоски ја презентираше специфичната дејност на установата, нејзината организациска поставеност, секторите и одделенијата, како и работните простории, со посебен акцент на специјализираните ателјеа за ѕидно сликарство и мозаик, за икони, за дрвена и камена пластика и за штафелајно сликарство, Информативно-документацискиот центар (ИНДОК), Физичко-хемиската лабораторија и библиотеката.
Соработката со оваа престижна институција беше воспоставена во декември минатата година, по работната посета на претставници од Министерството за култура и туризам во Центарот „Лајбниц“. Во изминатите месеци беа дефинирани насоки за развој на заеднички активности, кои вклучуваат едукација и обука на македонски стручен кадар во LEIZA, организирање семинари и обуки во земјава со реномирани експерти, како и разгледување можности за донација на опрема за конзерваторските лаборатории на НКЦ и други установи.
Оваа средба е дел од пошироката соработка која веќе резултираше со потпишување Меморандум за соработка со Германскиот археолошки институт, отворајќи нови перспективи за заеднички истражувачки проекти, размена на експерти и примена на современи научни методи.
Со вакви иницијативи ќе се зајакнат капацитетите на нашите установи, а конзерваторите ќе добијат можност за меѓународна афирмација и активно вклучување во светски истражувачки текови, придонесувајќи за унапредување на заштитата и промоцијата на културното наследство на РС Македонија.
Фото: Филип Кондовски, Виктор Ирвин Иванов
