RAPORT INFORMATIV
MBI AKTIVITETET E NDËRMARRA DHE HAPAT E MËTEJSHËM PËR MBROJTJEN DHE KONSERVIMIN E XHAMISË NË TABANOC
Data e vizitës:05.11.2027
Lokacioni:Tabanoc, Komuna e Kumanovës
1. Gjendja aktuale dhe aktivitetet e realizuara
Në kuadër të angazhimeve institucionale për mbrojtjen, ruajtjen dhe valorizimin e trashëgimisë kulturore, lidhur me Xhaminë në Tabanoc, deri më tani janë ndërmarrë aktivitete konkrete në bashkëpunim me institucionet kompetente.
Deri në këtë moment janë realizuar aktivitetet e mëposhtme:
– Qendra Kombëtare e Konservimit ka hartuar raportin mbi gjendjen faktike të objektit.
– Është realizuar një vizitë në terren dhe punë profesionale nga përfaqësues të Ministrisë së Kulturës dhe Turizmit, Qendrës Kombëtare të Konservimit, Drejtorisë për Mbrojtjen e Trashëgimisë Kulturore dhe Myftinisë së Kumanovës.
– Nga ana e Qendrës Kombëtare të Konservimit është përgatitur dhe dorëzuar aplikacioni përkatës për hartimin e projektit konservues.
– Me angazhimin dhe mbështetjen e Myftinisë së Kumanovës është realizuar pastrimi i hapësirës përreth objektit, si një nga aktivitetet fillestare për përmirësimin e gjendjes dhe krijimin e kushteve për ndërhyrjet e mëtejshme.
2. Hapat e mëtejshëm
Pas përfundimit të projektit konservues, i cili do të përfshijë të gjitha ndërhyrjet profesionale, teknike dhe të domosdoshme, do të shqyrtohen edhe mundësitë për realizimin e punimeve konkrete konservuese dhe ndërtimore në objekt.
Çdo ndërhyrje eventuale ndërtimore ose konservuese do të realizohet në mënyrë të vazhdueshme dhe në koordinim të plotë me:
– Ekipin profesional të Qendrës Kombëtare të Konservimit;
– Ministrinë e Kulturës dhe Turizmit;
– Myftininë e Kumanovës.
Qëllimi është që të gjitha ndërhyrjet të bazohen në standardet profesionale të konservimit, duke respektuar plotësisht vlerat historike, arkitektonike dhe kulturore të objektit.
3. Rregullimi i aksit rrugor
Një çështje tjetër me rëndësi për funksionalitetin dhe lehtësimin e qasjes në objekt është rregullimi i rrugës që mundëson aksesin deri te Xhamia në Tabanoc.
Në këtë drejtim, Komunës së Kumanovës do t’i kërkohet të shqyrtojë dhe të ndërmarrë masat përkatëse për rregullimin e aksesit rrugor deri te xhamia, në kuadër të kompetencave dhe mundësive të saj.
4. Përfundim
Angazhimi për Xhaminë në Tabanoc përbën një shembull të rëndësishëm të bashkëpunimit ndërinstitucional dhe përgjegjësisë së përbashkët në mbrojtjen e trashëgimisë kulturore.
Prioritet mbetet vazhdimi i koordinimit ndërmjet institucioneve kompetente, finalizimi i dokumentacionit dhe i projektit profesional, si dhe krijimi i kushteve për realizimin e fazave të mëtejshme të konservimit dhe valorizimit të këtij monumenti me rëndësi historike dhe kulturore.
Qëllimi përfundimtar është ruajtja e autenticitetit dhe e vlerave historike të Xhamisë në Tabanoc, si dhe sigurimi i kushteve për mbrojtjen dhe prezantimin e saj afatgjatë para brezave të ardhshëm.
