Inspektim profesional i vitrazheve të Borko Lazeskit në Monumentin “Makedonium” – Krushevë
Më 22.07.2026, një ekip profesional nga Qendra Kombëtare e Konservimit realizoi një inspektim të specializuar të kompozimeve të vitrazhit, vepër autoriale e piktorit akademik Borko Lazeski, të cilat janë pjesë përbërëse e Monumentit “Makedonium” në Krushevë.
Inspektimi u realizua si mbështetje profesionale për bartësin e projektit – Institucioni Kombëtar “Instituti dhe Muzeu” Prilep, me qëllim vlerësimin e gjendjes aktuale të elementeve të vitrazhit dhe përcaktimin e aktiviteteve të mëtejshme kërkimore, të cilat do të shërbejnë si bazë për përgatitjen e projektit për mbrojtjen e tyre afatgjatë, konservimin dhe restaurimin.
Në ekipin profesional morën pjesë mr. Vlado Mukovski, këshilltar i konservimit, dhe Orhan Osmani, konservues nga Institucioni Kombëtar Qendra Kombëtare e Konservimit – Shkup. Gjatë inspektimit u konstatuan dëmtime të shumta në konstruksionin mbajtës metalik, si dhe në xhamat e vitrazhit, duke u vlerësuar se është e nevojshme ndërmarrja urgjente e masave konservuese për mbrojtjen e tyre.
Në kuadër të punimeve të ardhshme kërkimore, të gjitha dëmtimet e konstatuara do të dokumentohen në detaje, do të analizohen dhe do të vlerësohen profesionalisht, me qëllim hartimin e dokumentacionit përkatës konservues-restaurues dhe sigurimin e mbrojtjes afatgjatë të këtij monumenti të rëndësishëm të trashëgimisë kulturore bashkëkohore maqedonase.
