TAKIM ME DELEGACIONIN NGA QENDRA PËR ARKEOLOGJI “LEIBNIZ” – MAINZ
Më 25 gusht 2025, në Qendrën Kombëtare të Konservimit – Shkup dhe në Muzeun e Republikës së Maqedonisë së Veriut u zhvillua një takim i rëndësishëm me delegacionin nga Qendra për Arkeologji “Leibniz” nga Mainz (Leibniz-Zentrum für Archäologie – LEIZA, Mainz), i udhëhequr nga drejtoresha e përgjithshme prof. dr. Alexandra Busch, e shoqëruar nga dr. Ingrid Stelzner dhe prof. dr. Roland Schwab.
Në kuadër të vizitës në Qendrën Kombëtare të Konservimit, drejtori mr. Aleksandar Jordanoski prezantoi veprimtarinë specifike të institucionit, strukturën e tij organizative, sektorët dhe departamentet, si dhe hapësirat e punës, me theks të veçantë në atelietë e specializuara për pikturë murale dhe mozaik, për ikona, për plastikë druri dhe guri, si dhe për pikturë në kavalet, Qendrën Informative-Dokumentuese (INDOK), laboratorin fiziko-kimik dhe bibliotekën.
Bashkëpunimi me këtë institucion prestigjioz u vendos në dhjetor të vitit të kaluar, pas vizitës zyrtare të përfaqësuesve të Ministrisë së Kulturës dhe Turizmit në Qendrën “Leibniz”. Në muajt e kaluar u përcaktuan drejtimet për zhvillimin e aktiviteteve të përbashkëta, të cilat përfshijnë edukimin dhe trajnimin e kuadrit profesional maqedonas në LEIZA, organizimin e seminareve dhe trajnimeve në vend me ekspertë të njohur ndërkombëtarë, si dhe shqyrtimin e mundësive për donacion të pajisjeve për laboratorët konservues të QKK-së dhe institucioneve të tjera.
Ky takim është pjesë e bashkëpunimit më të gjerë, i cili tashmë ka rezultuar me nënshkrimin e një Memorandumi Bashkëpunimi me Institutin Arkeologjik Gjerman, duke hapur perspektiva të reja për projekte të përbashkëta kërkimore, shkëmbim ekspertësh dhe aplikim të metodave bashkëkohore shkencore.
Me iniciativa të tilla do të forcohen kapacitetet e institucioneve tona, ndërsa konservuesit do të kenë mundësi për afirmim ndërkombëtar dhe përfshirje aktive në rrjedhat botërore të kërkimit shkencor, duke kontribuar në avancimin e mbrojtjes dhe promovimit të trashëgimisë kulturore të Republikës së Maqedonisë së Veriut.
Foto: Filip Kondovski, Viktor Irvin Ivanov.
