METODA BASHKËKOHORE PËR DOKUMENTIMIN E URËS SË JOKÇISË DHE URËS SË ARGULIÇIT NË KRATOVË
Institucioni Kombëtar – Qendra Kombëtare e Konservimit – Shkup, në kuadër të Programit Vjetor të Ministrisë së Kulturës dhe Turizmit për realizimin e interesit kombëtar në kulturë për vitin 2026, po realizon projektet për hartimin e projekteve bazë për konservimin dhe restaurimin e Urës së Jokçisë dhe Urës së Arguliçit në Kratovë. Në këtë proces zbatohen metoda bashkëkohore të rilevimit në terren, dokumentimit digjital dhe evidentimit të saktë të gjendjes faktike të urave.
Në kuadër të aktiviteteve për hartimin e Projektit Bazë për Konservimin dhe Restaurimin e Urës së Jokçisë në Kratovë dhe Projektit Bazë për Konservimin dhe Restaurimin e Urës së Arguliçit në Kratovë, u realizuan me sukses rilevimet topografike dhe fotogrametrike të objekteve dhe të mjedisit të tyre të afërt. Drejtuese e të dy projekteve është Mirjana Topuzoska, inxhiniere e diplomuar e arkitekturës dhe konservuese e lartë. Në realizimin e tyre marrin pjesë edhe anëtarët e ekipit profesional: mr. Kiril Denkovski, arkeolog, dhe mr. Tina Karovska, inxhiniere e diplomuar e ndërtimtarisë.
Në terren u krye rilevimi topografik, përmes të cilit u siguruan të dhëna të sakta gjeodezike lidhur me pozicionimin hapësinor të objekteve dhe konfiguracionin e terrenit. Paralelisht, u realizua edhe rilevimi fotogrametrik i të dy urave, me ç’rast u krijuan modele tredimensionale që pasqyrojnë gjendjen e tyre reale.
Si rezultat i rilevimeve të kryera, u përftuan baza matëse fotogrametrike me saktësi të lartë, të destinuara për përpunim të mëtejshëm grafik digjital dhe për hartimin e dokumentacionit të projektit. Këto baza mundësojnë paraqitjen e hollësishme të karakteristikave arkitektonike dhe konstruktive të urave dhe përbëjnë një bazë të rëndësishme për analizimin dhe dokumentimin e tyre, si dhe për përcaktimin e zgjidhjeve të përshtatshme të konservimit dhe restaurimit.
Zbatimi i teknologjive bashkëkohore të rilevimit dhe dokumentimit mundëson krijimin e një baze dokumentare të saktë dhe të verifikueshme, e domosdoshme për një qasje të përgjegjshme ndaj mbrojtjes së trashëgimisë kulturore. Modelet tredimensionale dhe bazat digjitale fotogrametrike matëse mundësojnë një pasqyrim më të qartë të gjendjes ekzistuese të objekteve, çka është me rëndësi të veçantë gjatë përgatitjes së zgjidhjeve projektuese të bazuara në karakteristikat reale të secilës urë.
Ura e Jokçisë dhe Ura e Arguliçit janë pjesë e peizazhit historik karakteristik të Kratovës, qytet që shquhet për mjedisin e tij të veçantë urban, arkitekturën tradicionale dhe objektet me vlera kulturore dhe historike. Dokumentimi profesional i tyre dhe përgatitja e dokumentacionit përkatës të projektit përbëjnë një hap të rëndësishëm drejt planifikimit të masave për ruajtjen e vlerave të tyre materiale, arkitektonike dhe kulturore-historike.
